काठमाडौं महानगरपालिका वडा नं ३२ पुरानो सिनामंगलमा बढदो शहरीकरणका कारण देखा परेका समस्याहरु समाधानका लागि नेपाल सरकारबाट वि.स. २०५३ साल र २०५९ सालमा भएका निणर्यहरु भए अनुसार काठमाडौं उपत्यका विकास प्राधिकरण अन्तरगत सिनामंगल जग्गा एकीकरण आयोजना वि.स. २०५३ देखि वि.स. २०६४ सम्म परियोजनाका रुपमा संचालन भएको सर्ब विदितै छ । सिनामंगल जग्गा एकीकरण आयोजनाले विकसित गरेका घडेरीहरुमा घर र जग्गा रहेका स्थायी बासिन्दाहरुले सोही आयोजना क्षेत्र वा प्लानिङ क्षेत्रलाई आफनो कार्य क्षेत्र वनाइ वि.स. २०५८ साल माघ २४ गते गैर नाफामूलक, गैर राजनीति र गैर सरकारी संस्थाका रुपमा छाता सँस्थाको रुपमा सिनामंगल नगरसेवा समाज स्थापना भएको यहाँहरुलाई अवगत नै छ । यस प्लानिङ क्षेत्रमा वसोवास गर्ने वासिन्दाहरु बीचमा आपसी परिचय, भाइचारा, सुसम्बन्ध र सम्पर्क कायम गर्दै भौतिक पूर्वाधार विकास र वातावरण संरक्षणका कार्यहरु व्यवस्थित एवं वातावरणमैत्रीपूणर् तरीकाले स्थानीय प्रतिनिधिमूलक र स्वयंसेवी संस्थाका रुपमा काम कारवाहीलाई सहजीकरण गरी कार्य सम्पादन गर्ने मुख्य उदेश्य रहेको छ । मुलुकमा संघीयता आगमनसंगै यस समाजको संगठनमा पनि रुपान्तरण गर्न वि.स. २०७४ चैत्र १२ गते मौजुदा विधान संशोधन समेत भएको छ ।

         सिनामंगल नगरसेवा समाजले आफनो कार्य क्षेत्रलाई ६ वटा ब्लकमा विभाजन गरी हरेक ब्लकवाट कम्तिमा एक जना महिला समेत २ जना सदस्यहरु प्रतिनिधित्व गराउने (१२ जना), निर्वाचनबाट अध्यक्ष, उपाध्यक्ष, महासचिव, सचिव र कोषाध्यक्ष समेत ५ जना एवम् अध्यक्षबाट मनोनित ६ जना सदस्यहरु सहित कुल २३ जना सदस्यहरु रहने व्यवस्था विधानमा गरिएको छ । समाजको कार्यहरुलाई प्रभावकारी ढंगले समाजको विकास होस भन्ने हेतुले सल्लाहकार परिषद गठनको प्रावधान रहेको छ ।